+

Uganda Oo Sheegtay Inaysan Ciiddankooda Iska Difaaci Karin Al-Shabaab

Uganda Oo Sheegtay Inaysan Ciiddankooda Iska Difaaci Karin Al-Shabaa

Taliyaha Guud ee Ciiddanka Uganda, General David Rubakuba Muhoozi ayaa hadalkaasi ku sheegay Wareysi uu siiyey Wargeyska Maalinlaha ee The Monitor ee ka soo baaxa magaalladda Kampala, wuxuuna si aan mugdi lahayn u muujiyey in Ciiddankooda loo daabulay Somalia si ay ula dagaalamaan Alshabaab inay go’doomeen.

 

Waxa uu intaasi ku daray inay Ciiddanka Uganda soo wajahday hoos-u-dhac Maaliyadeed, Loojistikada oo ku yaraatay iyo muran ka dhex jira Ciiddanka Somalia, waa sida uu hadalka u dhigay.

 

Waxa uu intaasi ku daray inaysan Ciiddanka DFS awood lahayn, iyadoo xitaa Deegaanadii ay horey u joogeen haatan la wareegeen Ciiddanka AMISOM.

Taliyaha Guud ee Ciiddanka Uganda waxa uu Wareysigiisa ku sheegay inaysan Ciiddankooda qeybta ka ah AMISOM weerar ku qaadi Karin Alshabaab, isla markaana ay mar hore burbureen qaar ka mid ah Saldhigyadda Aagga hore ee ay ka hawl-galaan.

 

Waxa kale oo uu walaac ka muujiyey xeelladda ay Alshabaab u adeegsadaan Miinooyinka nooca loo yaqaano (IEDs), wuxuuna tilmaamay inay ka fekerayaan qaabab kale oo ay ku yareyn karaan Khasaaraha ay kala kulmaan Qaraxyadda Alshabaab.

Dhinaca kale, Taliyaha Guud ee Ciiddanka Uganda, General David Rubakuba Muhoozi waxa uu xusay inay Ciiddanka AMISOM Badbaadi karaan, isla markaana hawl badan ka qaban karaa Aagga hore ee Dagaalka, haddii ay helaan Helikoptarada Dagaalka, loona ballan qaado maalgelin iyo Sahayda Loojistikada, waa sida uu hadalka u yiri.

 

Si kastaba ha ahaatee, Uganda waa dalkii ugu horreeyey ee Ciiddamo u soo dira Somalia sannadkii 2007-kii, waxayna Ciiddankooda yihiin kuwa ugu badan Ciiddamadda kale ee qeybta ka ah Hawlgalka AMISOM ee ka kala socda dalalka Burundi, Djibouti, Ethiopia iyo Kenya.


Shabakada Barbaariye Kala Soco Wararkii Ugu Danbeeyay

Nagala Xiriir E-mail [email protected]

Fikradaha Akhristayaasha (0)